首页分享难忘胡萝卜干

难忘胡萝卜干

来源：花匠小妙招时间：2025-01-12 14:59

文/周允中

我姆妈是浦东顾路人，我个小姨跟我姆妈感情很深，经常让子女来送土特产。夏天送玉米、南瓜、甜芦粟，冬天送鸡、鸭、鱼、肉、洋山芋。后来伊个儿子参加高考之前住辣阿拉屋里复习，送来个土特产就更是摸老老。

记忆最深个是，每年冬天，小姨总要用面粉袋送来满满一袋胡萝卜干。听说当地盛产胡萝卜，秋收以后，挑选品相好个胡萝卜，汏干净以后用刀一切四，浸过盐水，再放辣太阳下头晒干。最后出来个胡萝卜干看起来晶莹透剔，稍带紫红色。咬起来，咸中带甜有韧劲，味道交关赞。据说过去江南小镇个茶馆里经常有卖腌制胡萝卜干嗰，是一种邪气受欢迎个茶点。

我小辰光有段辰光市面浪物资匮乏，一个冬天，胡萝卜干就是我最好个零食。衣袋里塞几根胡萝卜干，花一角洋钿去附近嘉兴电影院看早早场，一面看电影，一面啃胡萝卜干，实在有点小乐惠。

最难忘个是，去天水路奇芳居茶馆，听扬州评话大师王少堂讲《武松十回》，每次侪听得入迷，连带去个胡萝卜干也忘记脱吃。等到散场一摸衣袋，胡萝卜干一根勿少，足见评话艺术个魅力。

现在，超市里各种零食看得人看花缭乱，搿种晒制胡萝卜干已经看勿见了。只有童年时代个记忆，回想起来还是老捂心嗰。