首页分享晨读 | 上海闲话：夜来汤香解秋思

晨读 | 上海闲话：夜来汤香解秋思

来源：花匠小妙招时间：2025-04-29 02:50

人间真味，在美食中，在时光中。

白露已过，按道理讲，到迭个季节，日里日光耀耀，夜里凉风习习，老清老早，一冷一热，会有粒粒露珠无声无息落勒草木浪，白茫芒，像霜。只可惜，斗转星移，万事变迁，眼门前勿见霜白，惟存秋思。

几日前去杭州云曼星，同学晓航家女公子即将远赴英伦求学，饯行宴，晓航拿出了一瓶囥了20年个茅台，20年辰光，讲伊长勿长，一个初长成个好小囡，又要开始一段新个旅程；讲伊短也勿短，倒出来个酒，依旧像当年个凛冽清透，更带一点点岁月个微黄，带一点点人间个甜味。

吃酒个来来回回浅斟慢饮，讲话个细细碎碎千言万语，从来就是，酒勿醉人，人自醉。

讲回眼门前，夏日未尽，勿见霜白，那就顺其自然。搿两天，辣手机里个买菜应用程序里发现了一种叫“夜香花”个蔬菜。

百度了一下，原来“夜香花”就是夜来香。好白相，从来只晓得有一只歌：“月下个花儿都入梦，只有那夜来香，吐露着芬香”，现在晓得了，伊也是一只菜。

按照百度浪个讲法，夜来香个香味辣夜里尤盛，对人个健康不利，因而应该放辣室外观赏，勿要放到房间里向。伊个花可蒸香油。花、叶可药用，有清肝、明目、去翳之效，华南地区民间有用作治结膜炎、疳积上眼症等。用夜香花煎鸡蛋是十分普通个吃法，此外，还可配肉类滚汤佐膳。既如此，搿就抓一把夏季里个鸡头米，汏清爽一捧独属于大热天里个夜来香，为着秋季，来一碗清热解暑又简简单单个夜香花汤：

夜香花二两，去脱花梗，只剩花骨朵，盐水里浸10分钟，冲清爽备用；新鲜鸡头米冲清爽，摆开水里滚三四分钟，夜香花倒下去，烧两三分钟就关火，加盐、麻油少许，就是一碗安安静静清清白白个汤了，老好吃。（沈一珠）